வேளாங்கண்ணியில் கத்தியுடன் திரிந்த நபரை போலீசார் வளைத்து பிடித்தனர்...

வேளாங்கண்ணி முச்சந்தி பகுதியில் பக்தர்களையும், பொதுமக்களை அச்சுறுத்தும் வகையில் கத்தியுடன் ரகளை செய்தவரை போலீசார் பிடித்தனர்.

புகழ்பெற்ற வேளாங்கண்ணி பேராலய ஆண்டு பெருவிழா கடந்த 29ம் தேதி கொடியேற்றத்துடன் தொடங்கி நடந்து வருகிறது. விழாவை காண தினந்தோறும் ஏராளமான பக்தர்கள் வந்து செல்கின்றனர். இந்நிலையில் வேளாங்கண்ணி முச்சந்தியில் 

மதுபோதையில் இருந்த ஒரு நபர் அப்பகுதியில் இருந்த கடையில் இருந்து கத்தியை எடுத்து  வேளாங்கண்ணி முச்சந்தி சாலையில் நடந்து செல்லும்  பொதுமக்கள், வாகன ஓட்டிகளையும் மிரட்டினார். இதனால் அந்த வழியாக பேராலயம் சென்ற பக்தர்கள் அச்சம் அடைந்து பேராலயம் நோக்கி சென்றனர். இது குறித்து

தகவல் அறிந்து அப்பகுதியில் ரோந்து பணியில் இருந்த போலீசார் துணிச்சலுடன் 

அந்த நபரை மடக்கிப் பிடித்து போலீஸ் வாகனத்தில் ஏற்றினர். பின்னர் அவர் வைத்திருந்த கத்தியை பறிமுதல் செய்தனர்.

 அந்நபரை வேளாங்கண்ணி காவல் நிலையத்திற்கு அழைத்துச் சென்று விசாரணை நடத்தினர். இதில் அவர் திண்டுக்கல் மாவட்டம் ஆத்தூர் காளியம்மன் கோயில் தெருவை சேர்ந்த மரிய மாணிக்கம் (43) என்பது தெரியவந்தது. வேளாங்கண்ணி பேராலயத்திற்கு வருகை தந்த அவர் மதுபோதையில் ரகளையில் ஈடுபட்டதால் போலீசார் தொடர்ந்து விசாரணை நடத்தி வருகின்றனர்.

 செய்தியாளர்: விஜய்